Раніца трэцяга дня юніёрскага планетарнага форуму ў Найробі прыносіць скакуну з шастом Мацвею Воўкаву залатую ўзнагароду з вынікам 5.45!

Прадстаўнік Беларусі ўступіў у барацьбу на вышыні 5.30, якую ўпэўнена пераадолеў з першага ж выхаду ў сектар. Наступныя рубяжы - 5.35 і 5.40 - Воўкаў прапусціў, з'явіўшыся на разбегу, калі планка паднялася на 5.45. Гэты вынік ён занёс у свой актыў толькі з трэцяй спробы, прымусіўшы сябе і гледачоў пахвалявацца. Традыцыйна ішлі ў гэтым сектары тактычныя бітвы, і на той момант з скачком на 5.35 лідзіраваў фін Юхо Аласаари, які ў выніку стаў срэбным прызёрам з гэтым паказчыкам. Бронзу заваяваў паўднёваафрыканец Кайлі Радэмеер, які ўзяў 5.30.

Мацвей, ужо ў статусе чэмпіёна, не стаў працягваць выступ і штурмаваць новыя вышыні. Дарэчы, нагадаем, што спартсмен з'яўляецца яшчэ прадстаўніком юнацкага ўзросту і наперадзе ў яго два гады стартаў у катэгорыі U20. Адзначым, што лідар сусветнага сезона і найбольш прынцыповы сапернік беларуса француз Энтані Аміраці сёння не справіўся з пачатковай адзнакай 5.30 і завяршыў выступленне без выніку.

Віншуем Мацвея, бацьку і трэнера Канстанціна Юр'евіча, усю яго сям'ю, а таксама ўсіх заўзятараў і сяброў з заслужанай і прыгожай перамогай! Ўпэўненыя, што наперадзе вас чакаюць новыя вышыні, рэкорды і п'едэсталы!