Для прадстаўнікоў відаў вынослівасці час цяпер асабліва складаны. Зімовы каляндар у іх і так некалькі адрозніваецца ад летняга. А тут яшчэ і пандэмія, вірус, які шмат каму даставіў непрыемнасці і зламаў працу. У выніку ні на адным з ужо мінулых стартаў мы, лічы, не ўбачылі ні поўнага камплекта прэтэндэнтаў на медалі, ні сапраўды сур'ёзных вынікаў. Аднак старэйшы трэнер па відах вынослівасці Андрэй Гардзееў лічыць, што на чэмпіянаце краіны сітуацыя збольшага можа змяніцца.
Па-першае, у Магілёў прыедуць амаль усе. «Амаль» – гэта таму, што тыя, хто засяроджаны на самых доўгіх дыстанцыях, зараз прадказальна занятыя сваімі справамі і працуюць па сваіх планах з прыцэлам на лета. Зрэшты, выключэнні ёсць і тут.
- З тых, хто яшчэ не бег у гэтым сезоне, у Магілёве, хутчэй за ўсё, убачым Ніну Савіну. Для яе гэты чэмпіянат стане адным з кантрольных зімовых стартаў. Мэтай будзе, хутчэй, кантроль формы, чым бег на рэзультат. Наўрад ці варта чакаць звышхуткасцяў. Ніна вядзе падрыхтоўку да Алімпійскіх гульняў.
Адзіны нарматыў для ўдзелу ў чэмпіянаце Еўропы ў памяшканні сярод прадстаўнікоў відаў вынослівасці пакуль ёсць толькі ў Дар'і Барысевіч. Але як раз яе ў Магілёве мы не ўбачым. Як адзначае Гардзееў, спартсменка цяпер знаходзіцца на зборы ў Кеніі, пасля якога ў Барысевіч запланаваны збор у Польшчы. Расклад сабраны не проста так. Па-першае, у Польшчы Дар'я зможа, нарэшце, папрацаваць са сваім трэнерам – Збігневым Крулем. Па-другое, чэмпіянат Еўропы таксама пройдзе ў польскім Торуні. Што ж тычыцца чэмпіянату краіны, то галоўную цікавасць на сярэдніх і доўгіх дыстанцыях там будуць прадстаўляць тыя, хто здольны далучыцца да Дар'і на чэмпіянаце Еўропы. Такіх, на думку Гардзеева, можна назваць досыць шмат.
- Кацярына Карняенка плануе выступіць у Магілёве на дыстанцыі 3000 метраў, хоць разглядаецца варыянт прабегчы і 1500. На першынстве краіны сярод юніёраў яна бегла 1500 метраў па-за конкурсам. Бегла максімальна хутка, каб «пахуткасціць» перад выступленнем на 3000, і, магчыма, паспрабаваць ужо там выканаць нарматыў на чэмпіянат Еўропы. У любым выпадку гэта было добрым падмацаваннем перад стартам на 3000 метраў.
Таксама на першынстве сярод юніёраў мы арганізавалі хуткі забег у мужчын на 1500 метраў. На старт выйшлі Сяргей Платонаў і Арцём Калачоў. Маглі бегчы, але ў выніку вырашылі прапусціць гэты старт Вячаслаў Скудны і Сяргей Карпаў. Кампанія цікавая. Як мінімум, адзін з гэтых хлопцаў, а пры добрым збегу абставінаў – адразу ўсё – здольныя прабегчы вельмі блізка да нарматыву на чэмпіянат Еўропы, а то і выканаць яго. Нягледзячы на тое, што прахадны рэзультат на гэтай дыстанцыі досыць высокі – 3:45.0. Другой магчымасцю паспрабаваць «зачапіць» гэты рэзультат для хлопцаў будзе як раз чэмпіянат Беларусі ў Магілёве.
Зрэшты, на чэмпіянаце Беларусі на дыстанцыях што 800, што 1500 метраў чакаецца выступленне ўсіх, хто звычайна мае медальныя амбіцыі ў гэтых відах. Канкурэнцыя тут у апошні час досыць высокая. Усе памятаюць феерычныя развязкі забегаў на 800 і 1500 метраў на летнім чэмпіянаце Беларусі! Узімку пакуль, праўда, падобнай шчыльнасці вынікаў мы не бачылі, а Кубак краіны Сяргей Карпаў і зусім выйграў з амаль секундным гандыкапам ад праследавацеляў. Казаць аб аптымальнай форме і ранейшага ўзроўню канкурэнцыі ледзь ці прыйдзецца і ў Магілёве, але менавіта там Гардзееў упершыню чакае на старце ўсіх асноўных удзельнікаў гэтай спрэчкі.
- Вячаслаў Скудны ў гэтым шэрагу свайго роду выключэнне. На дыстанцыі 1500 метраў ён будзе стартаваць з перспектывай паспрабаваць замахнуцца на нарматыў ці ж, як мінімум, хутчэй перад сваёй асноўнай дыстанцыяй. На чэмпіянаце Беларусі галоўным стартам для яго будзе 3000 метраў, дзе ў Славы ёсць рэальныя шанцы трапіць на чэмпіянат Еўропы. Нарматыў там 8:00.00. У гэтым сезоне ён ужо паказваў 8:09.5 на спаборніцтвах «Магатэкса», так што сцэнарый цалкам рэальны. Астатнія могуць хутка бегчы і на 800. Іншая справа, што раней іх не ўдавалася сабраць разам. Да чэмпіянату Беларусі, спадзяюся. Хлопцы ўсё ж падвядуцца ў адносна аптымальнай форме. Хоць, напрыклад, шкада, што траўміраваўся Паша Небыт. У яго здарылася, скажам так, павольна нарастаючае пашкоджанне, якое, у канчатковым рахунку, не дало магчымасць трэніравацца ў поўнай меры, і зімовы сезон для гэтага спартсмена, фактычна, выпаў. Хоць на дыстанцыі 1500 метраў ён бы сапраўды апынуўся сярод прэтэндэнтаў на добры рэзультат. Невялікая траўма ёсць у Іллі Карнавухава. Каб не пагоршыць сітуацыю, мы вырашылі не перагружаць яго зімой. Улічваючы, што ён пакуль можа выступаць на маладзёжных спаборніцтвах, галоўным арыенцірам для Ільі будзе летні чэмпіянат Еўропы, дзе ён можа прэтэндаваць нават на медаль.
Па маіх дадзеных, дрэннае выступленне Яна Сломы на Кубку Беларусі звязана з тым, што нядаўна ён перанёс каранавірус. Арганізм яшчэ не цалкам аднавіўся – адсюль і такі вынік. Наўрад ці варта чакаць ад яго суперхукасці і ў гэты раз, але ўсё ж павінен азначыцца некаторы прагрэс. Разлічваю, што Ян прабяжыць на ўзроўні 1:53-1:51, што дазволіць ацаніць дынаміку і яго выздараўлення, і набору формы. Дарэчы, падобная сітуацыя ў шматлікіх хлопцаў. Ёсць тыя, хто перанеслі каранавірус. У тым ліку – бессімптомна, на нагах, не спыняючы трэніровачны працэс. А як гэта адаб'ецца на іх рэзультатах можна пачынаць ацэньваць толькі цяпер. Пакуль выбудаваць паўнавартасны зімовы сезон не атрымліваецца, і больш-менш аб'ектыўная карціна ж з'явіцца толькі летам, калі хлопцы выйдуць спаборнічаць пасля вясновага базавага перыяду.
У дзяўчын таксама ўсе найлепшыя пакуль не збіраліся. Уплывае цэлы комплекс прычын. Хтосьці перахварэў, хтосьці здымаўся са спаборніцтваў з-за пашкоджанняў. У Магілёве плануецца выступленне Вольгі Немагай, але мы будзем глядзець на тое, як яна аднаўляецца пасля траўмы. Спартсменка ўжо прыступіла да досыць сур'ёзных трэніровак, але базавы перыяд завяршыўся толькі ў канцы снежня. Толькі нядаўна перайшлі да хуткаснай працы. Для яе старт у Магілёве можа стаць свайго роду праверкай гатоўнасці. Але, падводзячы рысу, можна адзначыць, што шанцы на тое, каб трапіць у Торунь, у нас маюць Каця Карняенка, Вікторыя Кушнір, якой як раз на чэмпіянаце Беларусі трэба будзе даказваць сваю гатоўнасць, Слава Скудны і хто-небудзь з хлопцаў на дыстанцыі 1500 метраў. Зрабіць гэта будзе няпроста, але я ведаю, што ўсе лідары рыхтуюцца да старту ў Магілёве вельмі сур'ёзна.
