З сённяшняга дня – 2 лістапада – у беларускіх школьнікаў афіцыйна пачаліся восеньскія канікулы. А гэта значыць, што разам з імі дадзены старт і трэцяму этапу рэспубліканскага спартыўна-масавага мерапрыемства "300 талентаў для Каралевы"!
Штогод фіналісты праекта ў складзе каманд сваіх рэгіёнаў на цэлы тыдзень адпраўляюцца на самыя сапраўдныя вучэбна-трэніровачныя зборы, якія праходзяць на базах дзіцячых аздараўленчых лагераў, санаторыяў, спартыўных цэнтраў. Там пад пільным наглядам прафесіяналаў – трэнераў-выкладчыкаў па лёгкай атлетыцы – яны паляпшаюць сваю фізічную падрыхтоўку і навучаюцца дысцыплінам, прадстаўленым у фінале.
У гэтым годзе эпідэміялагічная сітуацыя аказала істотны ўплыў на ўсе сферы жыцця, у тым ліку і на спорт. На жаль, па рашэнні мясцовага Упраўлення спорту і турызму ў сувязі са становішчам у рэгіёне каманда Віцебскай вобласці прапусціць трэці этап праекта. Усе астатнія зборныя ў страі і ўжо сёння заязджаюць на базы, дзе ім трэба будзе трэніравацца на працягу ўсяго канікулярнага тыдня. Адзначым, што стан здароўя юных спартсменаў кантралюецца, і ў перыяд правядзення збораў будуць выконвацца ўсе меры бяспекі.
А вось дзе ў 2020 годзе праходзіць трэці этап праекту для нашых падрастаючых талентаў:
- каманда Брэсцкай вобласці – Нацыянальны дзіцячы адукацыйна-аздараўленчы цэнтр "Зубраня"
- каманда Гомельскай вобласці – санаторый "Залатыя пяскі"
- каманда Гродзенскай вобласці – Нацыянальны дзіцячы адукацыйна-аздараўленчы цэнтр "Зубраня"
- каманда Мінскай вобласці – Нацыянальны дзіцячы адукацыйна-аздараўленчы цэнтр "Зубраня"
- каманда Магілёўскай вобласці – спартыўна-аздараўленчы цэнтр "Рудзея"
- каманда горада Мінска – Нацыянальны дзіцячы адукацыйна-аздараўленчы цэнтр "Зубраня"
Дзяцей чакаюць не толькі інтэнсіўныя трэніроўкі і адточванне навыкаў, але і новыя веды аб свеце лёгкай атлетыкі і цікавыя знаёмствы. Для каманд гэта магчымасць згуртавацца, падняць баявы дух і ўжо зараз наладзіцца на патрэбны лад перад фіналам, нават нягледзячы на тое, што да яго застаецца яшчэ больш за месяц. Пра тое, як жа дзеці праводзяць час падрыхтоўкі да сваіх галоўных спаборніцтваў, мы вам абавязкова раскажам на нашым афіцыйным сайце. А пакуль жадаем усім удзельнікам і іх трэнерам поспехаў, пазітыўнага настрою, станоўчых эмоцый, прадуктыўных заняткаў і, вядома, моцнага здароўя!
