Ужо ў гэтую пятніцу беларускі лёгкаатлетычны свет зноў зажыве ў спаборніцкім рытме. Першым буйным стартам зімовага сезону (да гэтага толькі ў некалькіх гарадах краіны прайшлі мясцовыя дзіцячыя першынства ў памяшканні) стане міжнародны турнір памяці Героя Савецкага Саюза генерал-лейтэнанта Дзмітрыя Міхайлавіча Карбышава. Гэтыя юнацкія спаборніцтвы могуць пахваліцца больш чым паўвекавой гісторыяй і зорнымі імёнамі ў ліку шматлікіх удзельнікаў, якія на працягу 63 гадоў выходзілі на арэну лёгкаатлетычнага манежа; спярша – старога, сягоння – новага, на базе якога размясціўся Брэсцкі абласны ЦАР. Сярод іх пераможцы і прызёры еўрапейскіх і сусветных форумаў, прычым не толькі ў катэгорыі рэзерву.
Калі ў першыя гады правядзення турніру тут выступалі юныя спартсмены з каманд горада Львоў (Украіна) і Брэсцкай вобласці, то ў апошнія дзесяцігоддзі гэты старт збіраў лёгкаатлетаў з усёй Беларусі і з розных гарадоў Украіны, Расіі, Польшчы, Літвы, Латвіі, Казахстана і Малдовы. 2020-ы, вядома, стане выключэннем. Нягледзячы на жаданне нашых бліжэйшых суседзяў зазірнуць «на агеньчык», статус міжнародных спаборніцтваў усё ж захаваць не ўдалося.
З аднаго боку, звужэнне геаграфіі да рэспубліканскага маштабу паменшыць канкурэнцыю на дарожках і ў сектарах, з другога – небагаты на старты год стане стымулам для спартсменаў паказваць максімальна высокія рэзультаты. І, здаецца, іх агульны ўзровень істотна пацярпець не павінен. Па спаборніцкім працэсе засумавалі ўсё; далейшы ход сезону, нягледзячы на ўсеагульную надзею на тое, што ён пройдзе па плане, на жаль, прадказаць таксама складана. Таму цяпер турнір памяці Д.М. Карбышава для маладых лёгкаатлетаў, свайго роду, глыток свежага паветра. На пастаяннай аснове ён яшчэ і «правадыр» у новы спартыўны сезон і нават год. Сустрэча, якая мае адбыцца, – фактычна першая, пачынаючы з лета, – нямала раскажа пра тое, хто прэтэндуе на лідарства і ў якой форме знаходзіцца. У юнакоў і дзяўчат у гэтым узросце акцэнты маглі істотна зрушыцца літаральна за паўгода.
Спаборнічаць юнакам у гэтым годзе трэба будзе ў катэгорыях 2004-2005 і 2006-2007гг.н. Імёны многіх з заяўленых для ўдзелу ў турніры спартсменаў, ужо даўно нам знаёмыя. За малым выключэннем на старт выйдуць практычна ўсе, хто ў мінулым годзе цешыў нас прыгожымі перамогамі і дастойнымі рэзультатамі. Мы ж традыцыйна напярэдадні адкрыцця сезона хочам разабрацца, хто ў горадзе над Бугам пастараецца прыкаваць да сябе нашу ўвагу. Пацвярджацца заяўкі будуць заўтра, нязначныя карэктывы амаль напэўна будуць мець месца, аднак у папярэдніх складах удзельнікаў можна знайсці шмат цікавага.
СПРЫНТ
Адна з галоўных дзеючых асоб у старэйшай узроставай катэгорыі – магіляўчанка Карына Кавалькова (2004г.н.). Мінулай зімой гэтая дзяўчына паказала 7.81 на дыстанцыі 60м і ўсур'ёз акрэсліла намер замахнуцца на юнацкі рэкорд краіны ў бегу на 60м з бар'ерамі, занёсшы ў свой актыў 8.60. Роўна такім жа значыцца найвышэйшае дасягненне турніру памяці Д.М. Карбышава, усталяванае сем гадоў таму Эльвірай Герман. Нацыянальнае, аўтарства Русланы Рашкован, на 15 сотых хутчэй. У мінулым летнім сезоне Карына, здаецца, не выціснула максімум са сваіх магчымасцяў, але ад гэтага інтрыга толькі расце. Да зімы спартсменка, па ўсёй бачнасці, падыходзіць у нядрэннай форме, а заключны год у юнацкай узроставай катэгорыі павінен матываваць яе заяўляць пра сябе на дарожцы як мага гучней. Што з гэтага выйдзе, мы ўбачым зусім хутка, а пакуль спадзяемся, што сваім першым стартам дзяўчына здолее здзівіць.
У бар'ерным спрынце канкурэнцыю ёй будзе складаць яшчэ адна маладая магілёўская спартсменка Аляксандра Чарнякова (2004г.н.), якая, зрэшты, у 2020-ым некалі прынцыповую саперніцу істотна адпусціла наперад. Яе найлепшымі секундамі ў дадзеным відзе праграмы па-ранейшаму значацца 9.07, паказаныя роўна год таму тут жа, у Брэсце. Больш пераканаўчымі і ўдалымі для Сашы ў летнім сезоне ўсё ж выглядалі яе забегі на 400м з бар'ерамі; кароткія дыстанцыі, якія суправаджаліся зменай расстаноўкі, даліся складаней. Тым не менш, зімой профільнай для яе застаецца менавіта 60-метроўка, і паглядзець, якія змены адбыліся з дзяўчынай з моманту яе апошняга старту, будзе цікава.
Што тычыцца самай кароткай гладкай дыстанцыі, то тут на дарожцы з'явіцца шэраг перспектыўных дзяўчат, якія ўпершыню стартуюць у старэйшай узроставай групе. Брэстаўчанка Карына Салаўёва (2005г.н.) на працягу ўсяго года не спускалася з п’едэстала пашаны рэспубліканскіх стартаў у малодшай катэгорыі і мае асабістае дасягненне на 60-метроўцы роўнае 8.00. Праўда, яшчэ цікавей абяцае скласціся яе выхад на больш доўгую дыстанцыю. У бегу на 300м юная спартсменка не выступала даўно, але на 200м яшчэ ў лютым разганялася да 26.17. Мінчанка Вераніка Самойлава (2005г.н.) раскрылася ў летнім сезоне, на адзіным рэспубліканскім старце ў сваім узросце перапісаўшы асабісты рэкорд на «сотні» (12.85) і забраўшы сабе першае месца ў фінале. На 60м яе дасягненне пакуль сціплей – 8.22, але ж і дзяўчына за год вырасла.
Для Валерыі Вольскай (2005г.н.), якая ў сезоне 2018-2019 «выносіла» ўсіх на сваім шляху, мінулы год стаў няўдалым. Падрастаючую лёгкаатлетку мучыла траўма, а гродзенскае вучылішча алімпійскага рэзерву ў выніку змянілася на сталічнае рэспубліканскае. Улетку несур'ёзныя рэзультаты дзяўчыны ўспрымаліся праз прызму абставінаў, але сягоння, пасля некаторых змен, якія адбыліся ў жыцці Леры, варта паспадзявацца, што ў Брэсце ёй удасца, як мінімум, наблізіцца да ўласных рэзультатаў. Яны, нагадаем, для стартаў у манежы роўныя 8.17 на 60м і 42.88 на 300м, на стадыёне – 8.04 і 41.04.
Удалым выдаўся мінулы сезон для гамяльчанкі Анастасіі Антоненка (2004г.н.), якая на рэспубліканскіх Алімпійскіх днях моладзі двойчы паднялася на п'едэстал у спрынце з асабістымі рэкордамі – 12.42 і 26.17 адпаведна і працгвае прагрэсіраваць. У Брэсце яна таксама будзе стартаваць у бегу на 60м і 300м. Патэнцыйна можа ўмяшацца ў барацьбу за ўзнагароды і віцебская спартсменка Аліна Салодкіна (2004г.н.), якая мае ў гэтым годзе ў сваім актыве 12.46 на 100-метроўцы і 26.25 на дыстанцыі ўдвая даўжэй.
Да пералічаных вышэй дзяўчатаў на 300-метроўцы далучыцца яшчэ шэраг тых, за кім будзе вельмі цікава паназіраць на будучым турніры. Напрыклад, Алеся Мышкевіч (2004г.н.) з Гродна. На працягу гэтага года яна заставалася другім нумарам за спіной больш старэйшай Дар'і Карповіч, але зараз з'яўляецца адной з галоўных прэтэндэнтак на лідарства ў сезоне. Прынамсі, на дыстанцыі 400м, дзе яе асабісты рэкорд на стадыёне роўны 57.65, а значыць, і да забегу на 300м у яе выкананні варта прыгледзецца. Брэстаўчанка Арына Краўцэвіч (2004г.н.) У 2020-ым на старт выходзіла не занадта часта, але ў ліпені нядрэнна праявіла сябе ў папярэдніх забегах на круг – 59.21. Яе калега па трэніроўках Ганна Лаўрысюк (2005г.н.) У гэтым годзе ўсе рэспубліканскія старты на 400-метроўцы скончыла ў ліку прызёраў, а лета – з асабістым рэкордам 59.93. Да таго ж у 2019-ым гэтая дзяўчына ўжо бегла 300м па стадыёне за 42.01.
Некаторыя будуць сумяшчаць сваё выступленне на дадзенай дыстанцыі з забегамі на больш доўгіх 600м. Гэта і Аліна Кірыенка (2004г.н.), якая ў летнім сезоне паказала 58.92 у бегу на 400м, і Ксенія Сляпцова (2005г.н.), якая ўпэўнена лідзіравала на бар'ерных 300м з дастойнымі секундамі – 46.42. Абедзве дзяўчыны прыедуць на турнір з Магілёва. Гамяльчанка Дзіяна Барысенка (2004г.н.) некалькі разоў «мяняла» хвілінную мяжу на 400-метроўцы на адкрытым паветры, а ў якасці асабістых рэкордаў у памяшканні на дыстанцыях, на якіх ёй трэба будзе стартаваць у Брэсце, мае 42.94 і 1:41.30. Выступіць у Брэсце і навучэнка РДВАР Паліна Градоўка (2005г.н.), якая год назад на дадзеных спаборніцтвах паказвала рэзультаты 43.74 і 1:42.94 адпаведна. Паліна, дарэчы, адна з нямногіх, хто ў сярэдзіне лістапада ўжо паспеў адкрыць зімовы сезон. На сваім першым старце спартсменка ўпэўнена прабегла 300м за 43.2 і на бліжэйшым старце вызначана будзе імкнуцца зрабіць гэта хутчэй.
Сярод дзяўчат малодшай узроставай групы фаварыткай на абедзвюх гладкіх спрынтарскіх дыстанцыях з'яўляецца кобрынская спартсменка Дар'я Шугай (2006г.н.), якая ўжо не раз была пераможцай і прызёрам рэспубліканскіх спаборніцтваў, нават нягледзячы на тое, што выступала, як правіла, з больш старэйшымі саперніцамі. Яе найлепшы вынік у бегу на 60м быў паказаны амаль год таму ў Мінску і роўны 8.00, а асабістыя рэкорды на 300-метроўцы на стадыёне і ў памяшканні раўняюцца адпаведна 42.42 і 42.87.
Сярод тых, каго можна запісаць у лік яе канкурэнтак, па меншай меры, у самай кароткай дысцыпліне, – віцяблянка Лізавета Кобелева (2006г.н.). У лютым гэтая дзяўчына ўжо паказвала 8.15 на гладкіх 60м, але куды большую цікавасць выклікаюць яе бар'ерныя забегі. У дадзеным відзе праграмы яна на працягу ўсяго года значылася лідарам, але яе асабісты рэкорд – 9.25 – застаўся не пабіты з мінулага турніру памяці Д.М. Карбышава. Тады, дарэчы, прадстаўніца Санкт-Пецярбурга Марына Васюк, якая стартавала па суседняй дарожцы, запісала на свой рахунак новае дасягненне спаборніцтваў – 9.01. Можа быць, у гэтым годзе Лізе атрымаецца апынуцца яшчэ хутчэй?
Гарадзенка Валерыя Адамовіч (2006г.н.) ярка праявіла сябе на галоўным ліпеньскім старце сваёй узроставай катэгорыі, стаўшы пераможцай першынства Беларусі ў бегу на 400м з новым асабістым рэкордам – 59.14. 60-метроўка, на якую яна заяўлена ў Брэсце, для яе вызначана кароткая, але вось яе з'яўленне на дыстанцыі 300м абяцае стаць цікавым. Гэты від у праграме спаборніцтваў сустракаецца не занадта часта, таму на сённяшні дзень найлепшымі секундамі Леры ў памяшканні значацца леташнія 44.24, паказаныя на гэтым жа старце, а на стадыёне – вераснёўскія 43.40.
Варта паназіраць і за дэбютанткамі дадзеных спаборніцтваў, якія толькі пачынаюць выступаць у малодшым юнацкім узросце, – выхаванкай Акадэміі лёгкай атлетыкі на базе РДВАР Вікторыяй Багдановіч і прадстаўніцай гомельскага рэгіёну Марыяй Шаршнёвай. Абедзве дзяўчыны 2007г.н. і абедзьве таксама выступяць і на дыстанцыі 600м. Значнымі перамогамі яны пахваліцца не могуць у сілу юнага ўзросту, але рэзультаты для сваіх гадоў ужо паказвалі дастойныя. Маша ў верасні прабегла 300-метроўку за 44.6, а дыстанцыю ўдвая даўжэй за 1:43.9, што рабіла яе адной з галоўных прэтэндэнтак на прызавыя месцы адмененай спартакіяды школьнікаў. Віка год таму ў манежы зафіксавала 1:45.9 на 600м, пакінуўшы ззаду тую ж Шаршнёву, а 400м пад заслону зімы пераадолела за 1:03.28. Зараз спартсменка гатовая бегчы значна хутчэй, што, будзем спадзявацца, і здарыцца ў Брэсце.
У юнакоў у спрынце ўсё значна больш туманна. Дакладней, месца лідара тут вакантнае ў абедзвюх узроставых групах, прычым гамяльчанін Рэнат Шугай, які з'яўляецца, бадай, галоўным прэтэндэнтам на яго, на турніры, які мае адбыцца, на старт не выйдзе. У старэйшых хлопчыкаў і дзяўчынак барацьбу за перамогу, хутчэй за ўсё, павядуць гродзенцы Віктар Жукоўскі (2004г.н.) і Леанід Герасімчык (2004г.н.), мінчанін Мікіта Малкін (2005г.н.) і брэстаўчанін Уладзіслаў Дзенісюк (2005г.н.). Усе яны мінулай зімой беглі 60-метроўку ў раёне 7.40 – 7.50, да гэтай павінны б дадаць. Зрэшты, нельга спісваць з рахункаў і іншых удзельнікаў.
У малодшых юнакоў рабіць здагадкі адносна фаварытаў яшчэ цяжэй. На лідарскіх ролях бачацца гродзенскі спартсмен Руслан Саломчанка (2006г.н.), які ў верасні паказаў рэзультат 7.74 на адкрытым паветры, і мінчанін Дзяніс Дзенісевіч (2007г.н.), які ў лістападзе зафіксаваў па ручным хранаметражы 7.1 на 60м і 24.0 на 200м. Але і акрамя іх, несумненна, хапае хлопцаў, настроеных на пачатку сезона бегчы хутка. На 300-метроўцы да іх далучыцца прадстаўнік сталіцы Мікіта Якімовіч (2006г.н.), у чыім паслужным спісе ўжо ёсць сярэбраная ўзнагарода гадовага першынства краіны. Тады спартсмен разагнаўся да 53.13 на 400м, і ў Брэсце яму па сілах паказаць вельмі дастойныя секунды як у крыху больш хуткаплынным забегу, так і на дыстанцыі 600м.
У катэгорыі старэйшых юнакоў акрамя названых вышэй хлопцаў на старце з'явіцца шэраг прэтэндэнтаў на высокія рэзультаты. Прадстаўнік Віцебшчыны Мікіта Аліхвер (2004г.н.) летні сезон фактычна прапусціў, але ў зімовым быў блізкі да таго, каб выбегчы з 52 секунд на 400м, а ў 2019-ым годзе, выступаючы яшчэ ў малодшай юнацкай катэгорыі, з лёгкасцю пакідаў у баку ўсіх сваіх сапернікаў. Спалучаць выступленне на дадзенай дыстанцыяй з забегам удвая даўжэй будуць брэстаўчанін Кірыл Семянчук (2004г.н.), які летам размяняў 01:58 у бегу на два круга па стадыёне, і мінчанін Уладзімір Куц (2004г.н.), які тады ж справіўся з 51- секундным рубяжом на 400м. Плануецца, што выйдзе на старт у гэтых відах праграмы і падрастаючы гродзенскі бягун Дзмітрый Новік (2005г.н.), якому ў гэтым годзе трэба будзе змагацца ўжо са старэйшымі сапернікамі. Здаецца, яму гэта цалкам па сілах, а леташнія рэзультаты (37.58 і 1:26.22), паказаныя спартсменам на гэтым турніры, павінны трансфармавацца ў больш хуткія секунды.
На працягу гэтага года барацьба ў бар'ерным спрынце ў юнакоў 2005-2006гг.н. ішла паміж двума лёгкаатлетамі з Баранавічаў – Максімам Піваварчыкам (2005г.н.) і Даніілам Лагвіненка (2006г.н.). На будучым старце яны апынуцца ўжо ў розных узроставых групах, і калі ў Данілы, які выбягаў з 9 секунд, прэтэнзіі на наступны год, відавочна, будуць толькі лідарскія, то Максіму ў старэйшай катэгорыі прыйдзецца некалькі цяжэй. На перамогу на будучым старце цалкам можа прэтэндаваць Ягор Казлоў (2004г.н.) з Віцебска, які ўлетку стаў другім на бар'ерных 110м падчас свайго галоўнага рэспубліканскага старту сезона.
СЯРЭДНІЯ ДЫСТАНЦЫІ
Акрамя тых спартсменаў, пра каго мы ўжо сказалі ў разрэзе спрынтарскіх дысцыплін, барацьбу на больш кароткай 600-метроўцы павядзе яшчэ шэраг хлопцаў. Прадстаўнікі Магілёўшчыны Ягор Рыжкоў (2004г.н.) і Уладзіслаў Гарбулін (2004г.н.) у пачатку кастрычніка здзівілі, прабегшы дадзеную дыстанцыю на спаборніцтвах у Бабруйску за 1:22.6 і 1:22.7 адпаведна. Справа была, праўда, на стадыёне, але заяўка ўсё роўна вельмі сур'ёзная. Гэтыя хлопцы і раней нядрэнна глядзеліся на рэспубліканскім узроўні, але гэтак высокія хуткасці за імі заўважаныя яшчэ не былі. І тым цікавей убачыць, як яны праявяць сябе на першым старце зімовага сезону. Зрэшты, у магчымасць падзення найвышэйшага дасягнення турніру, устаноўленага Янам Сломай на адзнацы 1:21.92, верыцца пакуль з цяжкасцю.
Павел Аляксеенка, які прадстаўляе Мінск і Віцебскую вобласць, гамяльчанін Кірыл Нікалайчык і брэстаўчанін Ілля Басавец (усе 2005г.н.) На працягу 2020-га з'яўляліся аднымі з найхуткіх хлопцаў малодшай узроставай групы. Менавіта ў такім парадку ўслед за Дзмітрыем Новікам яны фінішавалі на 800-метроўцы на галоўным старце летняга сезону. Цяпер ім трэба выступаць і заяўляць пра сябе ў кампаніі старэйшых. У Брэсце кожны з іх можа выбягаць з 01:30 і, хочацца верыць, зрабіць гэта ім удасца грунтоўна.
Рыжкоў, Гарбулін, Нікалайчык і Басавец выйдуць таксама на старт самага доўгага забегу турніру памяці Д.М. Карбышава – 2000м. Праўда, у старэйшых юнакоў галоўнымі фаварытамі там здаюцца іншыя. Па-першае, гамяльчанін Вячаслаў Макееў (2004г.н.), які год таму тут жа прабег дадзеную дыстанцыю за 5:58.96, але быў пакінуты чацвёртым. Па-другое, Анатоль Букавец (2005г.н.), які аформіў у летнім сезоне пераможны дубль на першынстве краіны і разлічвае ў Брэсце паказаць добры рэзультат. Дарэчы, больш хуткімі секундамі на «паўтарашцы» валодае менавіта Толік – 04:12 супраць 4:18; на «тройцы» ж асабісты рэкорд вышэй у Славы – 09:16 супраць 09:22. «Двойка» – дыстанцыя прамежкавая, барацьба на ёй можа стаць вельмі ўпартай, але наўрад ці тактычнай.
У малодшых юнакоў у забегу на 600м кампанію Мікіту Якімовічу складуць Максім Болтуць (2006г.н.) з Брэста, Павел Кузьміч (2006г.н.) з Кобрына і Цімафей Змушко (2006г.н.) з Гомеля. Праўда, у хуткасці цягацца з мінчанінам ім будзе няпроста. Затое на 2000м менавіта яны, па ўсёй бачнасці, стануць лідарамі. Кожны з іх яшчэ мінулай зімой «мяняў» 04:40 у бегу на 1500м, а Цімафей і Павел на першынстве краіны па кросе, які прайшоў месяц таму, размясціліся ў выніковым пратаколе забегаў на 2км вышэй астатніх сваіх аднагодкаў.
Частку дзяўчат, якія прэтэндуюць на высокія месцы ў бегу на 600м, мы ўжо назвалі. У старэйшай узроставай катэгорыі да іх далучыцца гамяльчанка Сняжана Сапончык (2004г.н.), якая ў пачатку сакавіка пераадолела тры кругі па манежы за 1:39.29. Яе асабісты рэкорд – самы высокі сярод заяўленых удзельніц, але проста на дыстанцыі ёй дакладна не будзе. У спісе ўдзельніц значацца і яе калегі па камандзе Ганна Шпак (2004г.н.) і Юлія Саутава (2005г.н.), чые дасягненні роўныя 1:39.43 і 1:41.49 адпаведна; і мінчанкі Аляксандра Савасцюк (2005г.н.) і Марыя Лагавая (2005г.н.), якія пакінулі за сабой дзве найвышэйшыя ступні п’едэстала ў бегу на 800м на летнім першынстве краіны сярод малодшых юнакоў. Апроч іх на старт выйдуц, гамяльчанка Анастасія Леў (2005г.н.) і магіляўчанка Дзіяна Будніцкая (2005г.н.), якія не раз траплялі ў лік прызёраў рэспубліканскіх першынстваў, але на больш доўгіх дыстанцыях.
Усе гэтыя спартсменкі, за выключэннем Сняжаны, будуць выступаць і на дыстанцыі 1000м. Але тон дадзенаму забегу, мабыць, задасць прадстаўніца Брэстчыны Кацярына Масюк (2004г.н.). Дзяўчына ў гэтым годзе выйграла ўсе рэспубліканскія старты, у якіх прымала ўдзел, не ўвайшоўшы ў прызы хіба што на першынстве краіны па кросе. Але там бегчы прыйшлося «тройку» – зусім няпрофільную для Каці дыстанцыю. Год таму на гэтым турніры яна адсвяткавала перамогу з рэзультатам 2:58.92; рэкорд спаборніцтваў вышэй – 2:55.50 – і трымаецца з 2005 года. Для таго, каб яго перасягнуць, прыйдзецца моцна пастарацца.
У бегу на 600м у малодшым узросце акрамя Вікторыі Багдановіч і Марыі Шаршнёвай на перамогу будуць прэтэндаваць гарадзенка Ксенія Бурноўская, мінчанка Карына Кавалькова (тёзка магілёўскай бар'ерысткі), гамяльчанка Вольга Давыдзенка і магіляўчанка Паліна Будзеніс (усе 2006г.н.). Ксенія сёлета праявіла зайздросную ўніверсальнасць, занёсшы ў свой актыў 1:01.90 на 400-метроўцы і 5:09.04 на «паўтарашцы». Вольга некалькі разоў увайшла ў лік прызёраў рэспубліканскіх першынстваў і цяпер мае асабістыя рэкорды, роўныя 5:01.81 на 1500м і 10:49.32 на 3000м. У актыве Паліны летам быў рэзультат 2:23.8 на 800-метроўцы. Карына не раз адзначалася дастойным выступленнем, хоць пакуль і крыху не дацягвала ні ў хуткасці, ні ў стабільнасці да вядучых медальныя разборкі саперніц. У лістападзе дзяўчына паказала 3:10.7 на тысячу і цалкам можа стаць адной з фаварытак менавіта на гэтай дыстанцыі. Праўда, выйдзе на старт і прадстаўніца брэстчыны Дар'я Кіслюк (2006г.н.), якая гэтай восенню заявіла пра сябе, стаўшы сярэбраным прызёрам перш на кросавым Кубку, а затым і першынстве краіны. Прычым гэтая спартсменка, здаецца, зараз на хаду і ад яе па праву можна чакаць хуткага бегу.
ХАДЗЬБА
Сярод хадакоў знайсці асабліва яркія прозвішчы на старце сезона, мабыць, будзе няпроста. У малодшай катэгорыі на перамогу прэтэндуюць брат і сястра Уладзіслаў і Уладзіслава Алясюк (2006г.н.), якія ўжо ўваходзілі ў лік прызёраў на першынствах краіны ў гэтым годзе. Дзяўчатам трэба будзе крочыць па манежы «тройку», і летні асабісты рэкорд Влады выглядае вельмі нядрэнна – 14:52.76. Хлопцам жа гэтай узроставай групы трэба прайсці «пяцёрку», большасці – першы ці другі раз у жыцці. Сваё дасягненне Улад на гэтай дыстанцыі ўстанавіў у ліпені – 25:12.24.
У старэйшых юнакоў у лідарах могуць абгрунтавацца Яўген Каляда (2005г.н.), які прагрэсіруе і нядаўна змяніў месца навучання з брэсцкага ВАР на гродзенскі, і яго старэйшы цяпер ужо калега па трэніроўках Кірыл Грыцкевіч (2004г.н.). У дзяўчат на старце з'явяцца дзве гаспадыні спаборніцтваў – Паліна Астапук (2005г.н.) і Валерыя Куліцкая (2005г.н.). Дарэчы, менавіта Паліна ў верасні на абласным першынстве апярэдзіла не заяўленую сягоння для ўдзелу ў спаборніцтвах Алесю Саванеўскую і паказала на фінішы вельмі нядрэнны рэзультат – 14:28.47. Лера не раз займала прызавыя месцы рэспубліканскіх спаборніцтваў сярод дзяўчат малодшага ўзросту і мае асабістае дасягненне на «тройцы», роўнае 14:35.93.
Ужо заўтра ў Брэст з'едуцца сотні юных лёгкаатлетаў, настроеных уступіць у новую спаборніцкую зіму з высокімі рэзультатамі і прыгожымі перамогамі. І ўжо заўтра мы працягнем знаёміць вас з тымі, хто будзе ствараць гісторыю 63 турніру памяці Героя Савецкага Саюза Дзмітрыя Міхайлавіча Карбышава.
