У другі дзень юніёрскага кантынентальнага форуму бронзавы медаль у кіданні дыска заваявала Аліна Нікіценка!

У другой спробе яна зафіксавала 52.82, якія і так дазволілі б ёй падняцца на трэцюю прыступку п'едэстала гонару. Але ў заключным выхадзе ў сектар Аліна дадала і з вынікам 55.04 стала бронзавым прызёрам чэмпіянату Еўропы U20.

Перамогу атрымала якая выступае пад нейтральным сцягам Віялета Ігнацьева, якая таксама дадала ў шостай спробе, - 58.65.

"Срэбра" ў прадстаўніцы Нідэрландаў Аліды Ван Даален - 55.63.

Мы віншуем Аліну і яе трэнера Міхаіла Міхайлавіча Дамаросава з заслужанай узнагародай! Малайцы!

Вось як Аліна пракаментавала сваё выступленне:

- Я вельмі задаволеная вынікам, таму што ўчора пасля кваліфікацыі пашкодзіла левую ступню. Я рада, што нягледзячы на складанасці змагла заваяваць медаль. Усё будзе добра. Я б, вядома, хацела працягнуць спаборніцкі сезон. Паглядзім, ці будуць яшчэ старты і як будуць ісці справы з нагой.