У Нацыянальным алімпійскім камітэце Рэспублікі Беларусь 17 лістапада адбылася рабочая нарада з удзелам намесніка прэм'ер-міністра Рэспублікі Беларусь Ігара Петрышэнка, першага віцэ-прэзідэнта НАК Беларусі Віктара Лукашэнка, міністра спорту і турызму Сяргея Кавальчука. Асноўнай тэмай нарады стала падрыхтоўка да Алімпійскіх гульняў XXXII у Токіа-2020 і XXIV зімовых Алімпійскіх гульняў у Пекіне-2022.

Удзел у пасяджэнні прынялі кіраўнікі і прадстаўнікі федэрацый (саюзаў, асацыяцый) па відах спорту, цэнтраў алімпійскай падрыхтоўкі, трэнеры і атлеты нацыянальных каманд. Абмеркаваны таксама пытанні псіхалагічнага клімату ў камандах і падрыхтоўкі да важных стартаў ва ўмовах пандэміі.

Рабочае пасяджэнне прайшло ў сяброўскай і цёплай атмасферы. Усе бакі былі настроены на канструктыўны дыялог. Трэнеры і спартсмены маглі наўпрост задаваць любыя пытанні кіраўніцтву спартыўнай галіны, абмяркоўваць ход падрыхтоўкі да будучых важных стартаў, пазначаць праблемы, на якія варта звярнуць увагу.

Кіраўнікі федэрацый, трэнеры і атлеты ў ходзе нарады адзначылі, што пры падрыхтоўцы да міжнародных стартаў, будучым Гульням у Токіа і Пекіне міністэрствам, НАК, цэнтрамі алімпійскай падрыхтоўкі ствараюцца неабходныя ўмовы для якаснай падрыхтоўкі:

– У лёгкай атлетыцы працуем па сваіх планах, усе нашы пажаданні выконваюцца. Вядома, хацелася б пабольш афіцыйных стартаў, але тут ад спартсменаў залежыць няшмат. Гэты час трацім на аднаўленне, лячэнне, калі ёсць неабходнасць. Балазе ўсё для гэтага ў нашых лёгкаатлетаў маецца. Зараз рыхтуемся ў спарткомплексе "Раўбічы", дзе створаны выдатныя ўмовы нават для скакуноў у вышыню, – распавёў чэмпіён II Еўрапейскіх гульняў у скачках у вышыню Максім Недасекаў.

Галоўны трэнер нацыянальнай зборнай па лёгкай атлетыцы Юрый Маісевіч адзначыў, што да 17-і ўжо наяўных алімпійскіх ліцэнзій прадстаўнікі каралевы спорту плануюць заваяваць яшчэ больш за 10. «Для гэтага ёсць усе перадумовы. За апошнія гады база, інфраструктура ў беларускім спорце значна змяніліся ў лепшы бок, дзякуючы ўпартай працы трэнерскага штаба з'явілася нямала цікавых маладых атлетаў. Таму, лічу, мы можам дадаць ліцэнзій да Токіа ўвогуле да 30-і. З боку кіраўніцтва спартыўнай галіны наша каманда заўсёды знаходзіць падтрымку, краінай зроблена ўсё, каб беларускія спартсмены паспяхова выступалі на міжнародных стартах», – распавёў Юрый Маісевіч.

Адным з герояў спартыўнага жыцця лістапада стаў веласіпедыст Яўген Каралёк, які заваяваў сярэбраны медаль чэмпіянату Еўропы па веласпорце на трэку ў алімпійскай дысцыпліне – омніуме. «Апошнія вынікі паказваюць: знаходжуся ў добрай форме. Не магу прад'явіць нейкіх прэтэнзій па маёй падрыхтоўцы да мінулага старту або будучых Алімпійскіх гульняў. Усё ідзе па вызначаным плане, умовы на мінскім велатрэку ўсім вядомыя – адны з найлепшых у Еўропе, таму застаецца толькі працаваць і дамагацца вынікаў», – падкрэсліў ён.

Прыкметнага прагрэсу за апошнія некалькі сезонаў дамагліся ў беларускім плаванні. Анастасія Шкурдай, Ілля Шымановіч – гэтыя імёны ўжо добра вядомыя ў свеце спорту. Аднак старшыня Беларускай федэрацыі плавання Эла Сяліцкая ўпэўненая, што яшчэ трэба зрабіць нямала, і без дапамогі з боку дзяржавы не абысціся. «У беларускіх плыўцоў на дадзены момант пяць ліцэнзій на Гульні ў Токіа: у Анастасіі Шкурдай, Іллі Шымановіча, Мікіты Цмыг, яшчэ дзве – у камбінаваных эстафетах. Сёння падрыхтоўку ажыццяўляюць 12 плыўцоў, якія мэтанакіравана рыхтуюцца да АГ. Плануем заваяваць дадаткова 2-4 ліцэнзіі. Тут трэба працаваць усім разам: федэрацыі, Мінспорту і НАКу. У бліжэйшых перспектывах – чэмпіянат краіны на «кароткай» вадзе ў Брэсце. Мы зацікаўлены ў правядзенні большай колькасці стартаў. На дадзеным этапе ў нас выступаюць толькі чатыры спартсмены ў Міжнароднай лізе плавання. Вынікі дастаткова нядрэнныя. Аддаленыя перспектывы будуць карэктавацца ў залежнасці ад эпідэміялагічнай сітуацыі, як мы зможам выбудаваць усю сістэму падрыхтоўкі з улікам задач, якія ставяцца для паспяховага выступлення на Алімпійскіх гульнях. Вырашаем пытанне аб падрыхтоўцы ў далейшым: ​​цэнтралізавана ці наадварот – дэцэнтралізавана. На дадзеным этапе мы прынялі для сябе рашэнне рыхтавацца паасобна. Чатыры нашых спартсмена знаходзяцца ў Венгрыі, адзін рыхтуецца ў Брэсце, адзін у Віцебску, адзін у Гомелі, астатнія рыхтуюцца на дзвюх базах у Мінску», – распавяла Эла Сяліцкая.

Сучасная база дазваляе гімнасткам рыхтавацца да Гульняў у любых умовах. Пра гэта распавяла галоўны трэнер нацыянальнай каманды па мастацкай гімнастыцы Ірына Ляпарская.

«Дзякуючы таму, што ў нас ёсць свой дом (заўв. – Палац мастацкай гімнастыкі), мы можам працягваць трэніровачны працэс нават падчас пандэміі. Праводзім спаборніцтвы, міжнародныя сустрэчы. Прыехалі нядаўна з Кубка Расіі. Наш 1 нумар Кацярына Галкіна выкарыстоўвае з карысцю гэты няпросты час: ёй зрабілі аперацыю ў Германіі, цяпер праходзіць перыяд рэабілітацыі. Салас і Гарноська актыўна працягваюць трэніроўкі. У ЧЕ ў Кіеве мы адмовіліся ад групавых спаборніцтваў: на жаль, захварэлі дзяўчынкі. Я ўдзячная за падтрымку, у тым ліку, фінансавую, усім: і НАКу, Мінспорту, спонсарам. Хацелася б развіваць мастацкую гімнастыку і ў абласцях. Мы не можам усіх забраць сюды, у Мінск. Я спадзяюся, што рэгіёны змогуць дапамагчы будучаму рэзерву на месцах. У нас усё будзе добра!»

11 ліцэнзійных турніраў да Алімпіяды чакаюць беларускую каманду па дзюдо ў 2021 годзе. Адзін з лідараў Марына Слуцкая адзначыла, што ва ўмовах пандэміі, выконваючы ўсе меры прафілактыкі, атлеты не спынялі вучэбна-трэніровачныя зборы, якія прайшлі не толькі ў спарткомплексе «Стайкі». «За апошнія гады ў Беларусі з'явілася нямала добрых баз. Напрыклад, рыхтаваліся і ў Пінску, і ва Ушачах. Не хапае толькі спаборніцкай практыкі. Мой апошні афіцыйны старт быў у лютым. Аднак і ў такіх умовах дзюдаісты нацэлены на ўдзел у Гульнях у Токіа», – адзначыла яна.

Нацыянальны алімпійскі камітэт Рэспублікі Беларусь з моманту заснавання з асаблівай увагай ставіцца да падтрымкі спартсменаў пры іх падрыхтоўцы да важных стартаў. Адной з галоўных складальнікаў дапамогі, асабліва маладых атлетаў, з'яўляецца праграма Алімпійскай салідарнасці МАК. У розныя гады больш за 50 беларускіх спартсменаў атрымалі магчымасць рыхтавацца да турніраў за кошт сродкаў МАК.

«Перад Гульнямі ў Ванкуверы і Сочы трэніравалася, у тым ліку, і за сродкі, атрыманыя па лініі Алімпійскай салідарнасці. Несумненна, гэта вельмі падтрымлівае і дапамагае, матывуе. Хачу падзякаваць і НАК Беларусі, і МАК, якія ўважліва паставіліся да нашага віду спорту пры падрыхтоўцы да Гульняў. Цяпер дзякуючы Мінспорту, лыжнаму саюзу, НАКу каманда рыхтуецца да Гульняў у Пекіне, дзе, спадзяемся, не згубімся», – распавяла беларуская гарналыжніца Марыя Шканава.

У завяршэнні нарады ўсе яго ўдзельнікі сышліся ў меркаванні, што падрыхтоўка да Гульняў у Токіа і зімовай Алімпіядзе ў Пекіне праходзіць згодна зацверджаных планаў. Усе вядучыя атлеты нацыянальных каманд па відах спорту працягваюць трэніравацца ў добрых умовах, выконваючы неабходныя меры прафілактыкі па распаўсюджванню каронавіруса.

Гульні XXXII Алімпіяды ў Токіа адбудуцца з 23 ліпеня па 8 жніўня 2021 года. Для ўдзелу ў гэтых важных стартах беларускія атлеты ўжо заваявалі 71 ліцэнзію ў 15 відах спорту. Да заканчэння тэрміну выканання кваліфікацыйных нарматываў у чэрвені 2021 года айчынныя атлеты плануюць атрымаць увогуле каля 100 алімпійскіх ліцэнзій.

Крыніца: noc.by

Фота: Дзяніс Касцючэнка