У мінулую пятніцу беларускія спартсмены, якія рыхтуюцца да выступлення ў складзе эстафетных каманд 4х400м, правялі кантрольную трэніроўку, у рамках якой кожны з нашых атлетаў пераадолеў 2 разы па 200м праз невялікі прамежак часу. Пасля забегаў мы пагутарылі з адной з нашых маладых і перспектыўных спартсменак – 19-гадовай Валянцінай Чымбар. Яшчэ ў 16 гадоў гэтая дзяўчына размяняла 55-секундную мяжу ў бегу на круг, у 17 прабегла бар’ерную 400-метроўку за 59.19, а мінулым летам разам з сяброўкамі па камандзе – Кацярынай Жываевай, Астэрыяй Лімай і Алінай Лучшавай – стала сярэбраным прызёрам чэмпіянату Еўропы U20 у эстафеце 4х400м з юніёрскім нацыянальным рэкордам – ​​3:37.06! Вашай увазе невялікае флэш-інтэрв’ю Валі.

Ты толькі што адпрацавала 2 па 200м. Што скажаш?

- Класна!

А што на твой погляд прасцей: адзін раз 400м ці 2 разы па 200м?

- Нават і не ведаю...

Як ты думаеш, які вынік паказала на гэтай адзнацы?

- Спадзяюся, што час быў нядрэнны.

Але сама сабой ты задаволена?

- Так, усё было цалкам нядрэнна для, так скажам, пачатку сезона.

Як праходзіць ваш сумесны збор?

- Усё добра. Змянілася абстаноўка – адразу неяк весялей стала. Калі сядзіш увесь час на адным месцы, вельмі сумуеш па гэтай спаборніцкай атмасферы. Зараз мы ўжо ўсе адзiн аднаго ўбачылі, правялі прыкідку, настрой толькі палепшыўся!

Якія асабіста ў цябе былі перажыванні з нагоды ўсёй гэтай сітуацыі і адсутнасці стартаў?

- Вельмі хацелася ўжо хутчэй адкрыць сезон, таму што лета ўжо наступіла, а ты яго нават і не адчуваеш. Бо звычайна ў нас з надыходам лета ўжо праходзілі важныя рэспубліканскія старты, адборачныя спаборніцтвы, усе былі з галавой у спорце, а цяпер усё складвалася па-іншаму...

Валя, скажы, калі ласка, у цябе ёсць мара быць у складзе алімпійскай эстафетнай каманды?

- Вядома! Нават хоць бы быць запасной...

А як ты думаеш, ці атрымаецца ў нашых дзяўчат трапіць на Алімпійскія гульні?

- Думаю, так, у нас у краіне ёсць моцныя 400-метравічкі, і нам яшчэ ёсць, што паказаць!

Карыстаючыся выпадкам, раскажы, што ж адбылося тады ў Швецыі падчас фіналу эстафеты 4х400м на юніёрскім чэмпіянаце Еўропы?

- Калі Аліна Лучшава і польская бягуння фінішавалі, у іх ішла моцная барацьба, і палячка спрабавала рукой трохі адхіліць Аліну назад. Гэта было вельмі відавочна і магло б паўплываць на наша выніковае месца, мы маглі застацца трэцімі. І мяне гэта ў той момант вельмі моцна раззлавала.

Дзякуй, Валя, віншуем цябе з першай прыкідкай. Верым у тое, што вы будзеце ўдзельніцамі наступных Алімпійскіх гульняў, якія пройдуць у Токіа ў 2021 годзе!